Dagstukkies met Louise 16 Desember 2019

Johannes 3:3:  #Gebore

Daarop sê Jesus vir Hom:  Dit verseker ek jou:  as iemand nie opnuut gebore word nie, kan hy die koninkryk van God nie sien nie.”

Ons God is werklik ‘n God van tweede kanse.  Hy weet dat ons sondige mense is, en dat Hy vir ons, nie net ‘n tweede kans gee nie, maar ons verseker dat dit die enigste manier is om die koninkryk van God te sien.  Ons kan God en sy koninkryk net sien as ons deur God aangeraak word, as geloof in ons harte deur Hom aangesteek word, as ons kindskap as ’n gawe van Hom ontvang.

Ek en jy weet dat om ‘n sinvolle lewe hier op aarde te kan geniet ons God moet toelaat om Heer en Meester van ons harte en ons lewens te wees. Die Heilige Gees por ons ook dikwels aan – jy weet mos daardie stil stem wat ons baie keer nie ag op slaan nie? In hierdie Advent tyd, wil ek die geleentheid aangryp vir ‘n tweede kans.  Jy kan die geleentheid aangryp vir ‘n tweede kans.  Ons kan opnuut gebore word deur die Here te vra om in ons harte te kom bly, en die middelpunt van ons bestaan te wees.

Dagstukkies met Naas 13 Desember 2019

 

Handelinge 2:17:  #Droom

So sal dit in die laaste dae wees, sê God:  Ek sal My Gees uitstort op alle mense:  Julle seuns en julle dogters sal as profete optree; julle jongmense sal gesigte sien; julle oumense sal drome droom”.

Die Woord leer mos vir ons in Amos 3:7 dat die Here niks doen sonder dat Hy eers Sy profete in kennis stel wat Sy planne is nie. Hier sien ons dit baie duidelik wanneer Hy praat oor wat in die laaste dae gaan gebeur. Selfs in die laaste dae gaan mense drome droom! God gaan in naggesigte en drome mense besoek en inlig oor die dinge wat kom.  Dit gaan egter weereens bemoedigings, maar ook waarskuwings wees vir die mens om in gereedheid te kom vir wat oppad is.

God beloof ons in hierdie skrif in Handelinge 2:17 wat ook verwys na wat die profeet Joël gesê het in Joël 2:28 dat die ou mense drome sal droom en die jongeling gesigte sal sien wat God self in die nag aan hulle sal kom wys.  Omdat Hy ons so lief het is dit steeds God se begeerte dat die mens gereed sal wees vir Sy wederkoms. Daarom ook juis dan hierdie besoeke in drome en gesigte aan Sy kinders om skoon en rein te lewe.

Wanneer ons rondom ons kyk besef ons dat ons werklik in die laaste dae lewe. Die wêreld is boser as ooit. Meeste profesieë het reeds in vervulling gekom en die huidige wêreldgebeure herinner sterk aan wat die profete geskryf het, sommige nog voor die geboorte van Jesus. Natuurlik sien ons ook dinge gebeur waarvan Jesus gepraat het tydens Sy lewe hier op aarde. Dis asof ‘n fliek besig is om voor ons af te speel, ‘n fliek waarvan ons reeds die voorprent gesien het want die dinge wat gebeur is vir ons nie meer snaaks nie. Ons is bekend daarmee. Ons weet dit gaan gebeur want die Bybel waarsku ons daaroor.

Dan kom God en besoek ons in drome en gesigte omtrent die dinge van die laaste dae en WEET ons dat Sy koms voor die deur is! As ons mooi luister in die gees, kan ons alreeds die perde pote op die Hemelse Plaveisel hoor terwyl hulle ingespan word vir die wederkoms van onse Here Jesus Christus.  Kom ons wees gereed om te kan sê “MARANATHA”. Ja, kom Here Jesus, ons verwag U!  Wees geseënd!

Dagstukkies met Naas 12 Desember 2019

Matteus 1:20:  #Droom

Terwyl hy dit in gedagte gehad het, het daar ‘n engel van die Here in ‘n droom aan hom verskyn en gesê: “Josef seun van Dawid, moenie bang wees om met Maria te trou nie, want wat in haar verwek is, kom van die Heilige Gees”.

Wanneer ek na hierdie gedeelte in die Bybel kyk, sien ek hoe die Here so bekend is met elke stuk emosie waarmee ons op ‘n daaglikse basis moet deel en waarmee ons te doen het.  Josef was verloof aan sy Maria en was van plan om met haar te trou, maar omdat Josef ‘n eerbare en regverdige man was, het hy seker gemaak dat hy die regte pad met sy voornemende bruid stap. Daar was nie plek vir foute nie. Toe sy egter swanger raak het hy geweet dat dit nie sy kind was nie. Hy was seker van sy feite. Hy het nie nodig gehad om te wonder nie. Hy het geweet.

Ons lees dat hy in die geheim beplan het om van haar te skei sodat hy haar nie in die openbaar sou verneder nie. Nog steeds die eerbare man wat steeds bereid was om sy verloofde te beskerm.  God stuur egter een van Sy Engele om in die nag aan Josef te verskyn in ‘n droom. In hierdie droom kom die Engel in opdrag van God om Josef te kom gerusstel, om aan hom die plan van God te kom verduidelik, maar ook om aan Josef die opdrag te gee oor die Naam van die Seuntjie wat eendag bo alle Name sou wees.

Die Engel self verduidelik aan hom die menslik onmoontlike, menslik onverstaanbare plan van God om die wêreld van sy sondes te kom verlos deur Sy eie Seun te stuur – “…maar Hy het Homself ontledig deur die gestalte van ‘n dienskneg aan te neem en aan die mense gelyk te geword; en in gedaante gevind is as ‘n mens, het Hy Homself verneder deur gehoorsaam te word tot die dood toe…”(Fil 2:7-8).  Dan lees ons dat Josef gedoen het presies soos die Engel hom beveel het. Weereens word daar ‘n premie gekoppel aan gehoorsaamheid.

Liewe leser, ek wil hê dat jy vandag sal hoor dat God bekend is met elke bekommernis, elke versugting, elke probleem en elke uitdaging waardeur jy tans gaan. Hy stel belang in jou. Neem vandag die vrymoedigheid om met die Here te gaan praat omdat die Woord in Hebreërs 4:16 sê: “Laat ons dan met vrymoedigheid na die troon van genade gaan sodat ons barmhartigheid kan verkry en genade vind om op die regte tyd gehelp te word.” Die Here seen jou!

Dagstukkies met Naas 11 Desember 2019

Daniël 2:19-20:  #Droom

Daarop is in ‘n naggesig die geheim aan Daniël geopenbaar.  Toe het Daniël die God van die hemel geloof. Daniël het toe gespreek en gesê: mag die Naam van God geprys word van ewigheid tot ewigheid, want die wysheid en die krag is Syne.”

God besoek Sy kinders in drome en naggesigte vir verskeie redes. Waarskuwings, bemoedigings en beloftes om ‘n paar te noem. Vandag sien ons hoe God vir Daniël red van ‘n gewisse dood deur ‘n droom.

Daniël is diep in die moeilikheid. Nie net sy lewe nie, maar ook dié van sy drie vriende word bedreig deur iets wat glad nie hulle skuld was, of deur hulle toedoen veroorsaak was nie.

Koning Nebukadneser het ‘n droom gehad en hy stel die menslik onmoontlike ultimatum aan al sy wyse manne. Nie net sy droom uitgelê word nie, maar hul moet ook bekend maak dit wat die koning gedroom het. By gebreke hieraan sou almal van hulle in stukke gekap word en van hulle huise mishope gemaak word. Die feit dat dit onregverdig is verander egter nie Daniël- hulle se penarie nie. Die besluit van die koning staan vas, en wanneer die teregstelling van al sy wyse manne na die enigste uitweg lyk, kom Daniël van dit te hore en hy raadpleeg sy God, die Here van die leerskare.

God besoek hom dan in ‘n naggesig en wys aan Daniël die droom, en gee ook aan hom die uitleg van die droom. Presies die onmoontlike wat die koning van sy wyse manne verwag het. Wanneer Daniël dan die droom en sy uitleg aan die koning bekend maak, besef die koning dat die God van Daniël die enigste ware God van hemel en aarde is.  Nie net red hierdie openbaarmaking die lewens van Daniël en sy drie vriende nie, maar ook die lewens van al die koning se wyse manne.

Is dit nie presies hoe God vandag nog werk nie? Wanneer ons op Hom vertrou, maak dit nie saak hoe onregverdig die lewe is of hoe groot die krisis is wat voor ons opduik nie. God het die vermoë om ons uit elke situasie te red as ons lewe voor Hom regverdig is.  Soos Psalm 34:20 sê, “Al word die regverdige ook deur hoeveel rampe getref, die Here red hom uit almal.”

Skep moed my vriend, my vriendin. Geen saak is voor God onmoontlik nie. Al lyk dinge HOE donker, God is steeds in beheer. In Johannes 10:29 belowe Jesus self dat niks ons uit Sy hand sal ruk nie. Kom ons loof Hom daarvoor!

 

#TrotsSA, ons Top 10 vir 2019

Die Radio Tygerberg-nuusspan het hul top tien redes om trots Suid-Afrikaans te wees, saamgestel. Hoe lyk jou top 10 vir 2019?

  1. Mej Suid-Afrika Zozibini Tunzi is op 8 Desember as Mej. Heelal gekroon. Saam met Margaret Gardiner in 1978, gevolg deur Demi-Leigh Nel-Peters in 2017, is Zozibini die derde Suid-Afrikaner om die Mej Heelal-kroon te wen. Sy is ook die eerste Mej. Heelal om die splinternuwe “Power of Unity”-kroon met ‘n waarde van R73 miljoen, te dra.

Foto’s: Miss Universe FaceBook-blad
  1. Die Springbokke is op 2 November as die wêreldkampioene aangewys toe hulle Engeland met 32-12 in die finale wedstryd van die 2019 Rugby Wêreldbeker-toernooi geklop het. Die Bokke se keurders het ook geskiedenis gemaak deur Siya Kolisi as die eerste swart kaptein aan te wys.

Foto’s: Getty Images, FaceBook-blad
  1. Die Blitzbokke het die gees van Rugby Sewes-Wêreldbeker lewendig gehou toe die span op 8 Desember as wenners die Wêreldbekertrofee by die Dubai Sewes-toernooi verower het. Die Blitzbokke het die Royal Jesters 28-12 in die finaal geklop.

Foto’s: Blitzbokke Twitter-blad
  1. Die Suid-Afrikaanse Protea-netbalspan het op 22 Oktober as die 2019 Afrika Netbal-kampioen uitgestyg bo ander spanne toe die span vir Zambië 72-53 gewen het.

Foto’s: Netball SA Twitter-blad
  1. Die Ndlovu-jeugkoor van Limpopo, is die eerste Suid-Afrikaners om na die eindrondte van die gewilde Amerikaanse talentkompetisie, America’s Got Talent, deur te dring. Die koor het op 19 November geskiedenis gemaak deur die eerste Suid-Afrikaanse musiekgroep te word wat die Hollywood Music in Media-toekenning in die kategorie van “Best Independent Music Video” kon wen saam met Grammy bekroonde Suid-Afrikaanse fluitspeler Wouter Kellerman.
Foto’s: FaceBook-blad
  1. Die 27-jarige Anrune Weyers het Suid-Afrika se eerste goue medalje by die 2019 Paralimpiese Wêreldkampioenskappe in Dubai gewen toe sy die kampioenskaprekord in die vroue se 400m T47 gebreek het om die eerste plek te behaal. Ntando Mahlangu het op sy beurt ‘n goue medaljie in die mans 200m T61-kategorie behaal. Charl du Toit het brons in die mans se 400m T37 verwerf terwyl Reinhardt Hamman ‘n brons medaljie in die mans F38 spiesgooi finale ontvang het.
    Foto’s: Anrune Weyers Twitter

 

  1. Die KwaZulu-Natal boorling, Majoor Mandisa Nomcebo Mfeka, ‘n Suid-Afrikaanse Weermag-vlieënier, het in Maart vanjaar die wêreld se eerste swart vroulike vegvliegtuigloods geword.

Foto’s: www.uncensoredopinion.co.za/
  1. Die 21-jarige swemmer, Tatjana Schoenmaker, het die eerste Suid-Afrikaanse vroulike swemmer geword om ‘n medalje by die FINA Wêreldkampioenskappe vir langafstandswem te behaal toe sy tweede in die 200 m-borsslag tweede geëindig het. Sy het die week daarna weer geskiedenis gemaak deur twee goue medaljes by die FINA Swem Wêreldbeker 2019 te wen.

Foto’s: Getty Images

 

  1. Suid-Afrika het onlangs die Junior Ballet Klein Groep kampioenskap by die Internasionale Dans Organisasie se Wêreld Ballet en Jazz kamioenskappe in Warskou, Pole gewen.

Foto’s: Michelle Nesbitt

 

10. Die 24-jarige Phumelela Mapukata is onlangs aangewys as Mr Death World aangewys. Hy het 20 deelnemers van 11 lande uitgestof om hierdie titel te wen. Hy wil sy titel gebruik om bewustheid en groter inklusiwiteit vir dowe mense in Suid-Afrika te skep en sê:

“WE NEED TO HAVE MORE SCHOOLS THAT TEACH DEAF PEOPLE SKILLS THAT DON’T REQUIRE THEM TO BE EMPLOYED BY SOMEONE ELSE.”

Foto’s: SADC News
Hooffoto : Vlae – GoodThingsGuy

 

Dagstukkies met Naas 10 Desember 2019

                                 

 Genesis 46:2-3:  #Droom

En God het tot Israel gespreek in naggesigte en gesê:  ‘Jakob, Jakob!’  En hy antwoord: Hier is ek! Toe sê Hy:  ‘Ek is God, die God van jou vader.  Moenie bevrees wees om na Egipte af te trek nie, want Ek sal jou daar ‘n groot nasie maak.”

Ons het gister gesien hoe God die mens besoek in ‘n droom om hom te waarsku. Vandag sien ons hoe God vir Jakob besoek in ‘n droom om ‘n totale verskillende rede.  God roep vir Jakob terwyl hy slaap en onmiddellik antwoord Jakob “Hier is ek”. Wat hy daarmee te kenne gee is: hier is ek, Here, praat maar ek luister. Is dit ook ons gesindheid wanneer God met ons praat, of hoor ons partykeer nie so lekker nie? Ek vra sommer maar…

Dan sê God vir hom wie Hy is. Hy stel Homself bekend as die God van sy vader Isak. Duidelik het Jakob geweet wie hierdie God is. Isak het hom vertel van hierdie wonderwerkende God. Isak was immers op die altar, gereed om geoffer te word, onthou jy?  Toe Jakob dus die stem van God hoor, het hy presies geweet wie hierdie God is. Die volgende strofe bevestig dan ook dat Jakob op een of ander stadium tot hierdie God van sy vader gebid het vir raad. Eerstens seker oor die groot stuk onsekerheid wat skielik voor hom lê, en ook omdat hy dalk bietjie bang was vir die lang reis wat voorlê. Daarom dan die vertroostende woorde dat hierdie God wat sy vader van ‘n offer dood gered het, hom ook sal beskerm met die woorde “Moenie bevrees wees nie”.  Moenie bang wees nie. Dieselfde woorde wat Jesus ook aan Sy dissipels gesê het tydens die storm op die see van Galilea!

Nadat Jakob die vertroosting ontvang het om nie bang te wees nie, kom die belofte van God af dat Hy self vir Jakob ‘n groot nageslag gaan gee! Jakob, wat deur omstandighede gedwing word om af te trek na Egipte, word gehoorsaam aan God en ontvang dan ook die belofte van die seën wat op hom sou wag wanneer hy in Egipte aankom.  Deur sy gehoorsaamheid aan God – soos sy oupa Abraham en sy vader Isak – word Jakob deel van die Naam wat God self aanhaal wanneer Hy later na Homself verwys as die God van Abraham, Isak en Jakob.

Jy sal onthou dat niks tussen Abraham, Isak en Jakob se gehoorsaamheid aan God kon kom nie. Niks was belangriker nie.  Daarom ook Samuel se woorde aan Saul: “…Kyk, om gehoorsaam te wees is beter as slagoffer, om te luister beter as die vet van ramme…” (1 Sam 15:22).

Kom ons wees gehoorsaam aan God om te lewe soos Hy van ons verwag!

Dagstukkies met Naas 9 Desember 2019

       

  Job 33:14 – 18:  #Droom

Want God spreek op een, ja, op twee maniere, maar die mens let nie op nie.  In die droom, in ‘n naggesig, as diepe slaap op die mens val tydens sluimeringe op die bed, dan open Hy die oor van die mense, en Hy druk die seël op die waarskuwing aan hulle; om die mens terug te hou van sy onderneming en trotsheid vir die man te verberg, sodat Hy sy siel kan red uit die kuil en sy lewe, dat dit nie omkom deur die spies nie.”

Van die vroegste tye af leer ons dat God baie keer met die mens gespreek het deur drome. Dis vandag nog die geval. Hoeveel keer het jy al ‘n droom gehad net sodra jy insluimer? Nog voor jy vas slaap! Dan weer met ander tye wanneer jy diep in droomland is.  Dis waarvan Job praat in hierdie gedeelte.

Ons weet dat Job die oudste boek in die Bybel is. Ja, jy het reg gelees.  Job is die oudste boek van die Bybel. Nie Genesis nie. Nou sê Job, God praat met die mens deur naggesigte as diepe slaap op hom val, maar ook voor hy diep slaap, net sodra hy insluimer op die bed. Daar is dus spesifieke redes waarom God met die mens praat.

Wanneer ek hierdie gedeeltes lees in Job 33 vanaf vers 14, word ek net weer opnuut bewus van God se absolute liefde en belangstelling in die mens. Sy begeerte om met Sy kinders te kommunikeer. Grotendeels ook omdat Hy die mens liefhet en bekommerd is oor sy welstand soos dit ‘n goeie Vader betaam.  Daarom dan juis die waarskuwing in hierdie gedeelte teen verkeerde gedagtes en dade, en hier praat Job spesifiek van trotsheid. Hoogmoed. God besoek die mens in sy slaap om hom te waarsku teen hierdie dinge wat hom sy lewe kan kos. Let op wat Job sê in vers 18. “Sodat Hy sy siel kan red uit die kuil en sy lewe, dat dit nie omkom deur die spies nie!”

In Spreuke 16:18 lees ons “trotsheid kom voor die verbreking en hoogmoed kom voor die val”.  So sal dit dan wees met die trotsaard. Met die hoogmoedige. Jesus sê self in Matteus 11:29 dat Hy, wat Jesus is, sagmoedig is en nederig van hart.  Jakobus skryf in hoofstuk 4:6 “…daarom sê Hy: God weerstaan die hoogmoediges, maar aan die nederiges gee Hy genade.”

Kom ons besluit vandag om, met God se genade, onsself nie beter te ag as ‘n ander nie. Daar is ‘n ou koortjie wat ons gesing het toe ek jonk was met die titel “te wees soos Jesus”.  Kan ek vra dat dit ons begeerte sal word om te wees soos Jesus…

 

Naas se #droom van Restoration vir die Kaap

‘n Nuwe stem op die 104FM-klankgolwe droom van herstel en oorgawe van die Kaap, is aan die brand vir Jesus en doen dit alles musiekinstrument onder die arm! Ontmoet pastoor Naas van Tonder.

Naas van Tonder, of te wel Ignatius,  is ‘n passievolle en vurige man vir die Here.  Ignatius beteken vuur so jy kan niks minder verwag nie.  Gebore en grootgeword in Pretoria, is dit hier waar Naas ook regte studeer het.  Na sy bekering in 1994 het hy besluit om Teologie aan te pak.  Die groot rede waarom Naas in die bediening ingegaan het is dat hy besef het hoe groot die oes is en hoe min die arbeiders is.  Ook het hy besef hoe belangrik siele vir God is.  Naas het weer uit voltydse bediening beweeg en werk nou vir ‘n maatskappy wat spesialiseer in ontwerp en projekbestuur maar is ook die pastoor van sy eie bediening bekend as “Restoration”.

Die Here het vir hom ‘n visie gegee van ‘n groot breekwatermuur wat skepe beskerm van die see terwyl hulle gerestoreer word en hy het daarna presies geweet wat sy skeppingsdoel is!   Hierdie bediening se fokuspunt is om mense wat iewers in hul lewe seergekry het en waar die vyand kom steel het, weer heel te maak deur hulle te herinner aan Jesus se liefde en plan vir hul lewe.  ‘n Ander tak van hierdie bediening is kampe wat elke paar maande gehou word met die naam “Camp Restoration”.

Naas is getroud met ‘n pragtige vrou en helper in sy bediening, Helene, en het vier kinders en vier kleinkinders.  Hy geniet kamp en ry graag fiets.  Hy is talentvol en speel ses instrumente wat klavier, dromme, kitaar, orrel, trompet en die trekklavier insluit.

Naas se droom is dat nie net die hele Wes-Kaap nie maar ook die hele Suid-Afrika tot inkeer sal kom en na God sal draai.  Naas is hierdie week ons skrywer van Dagstukkies met Naas met die tema #Droom.

 

 

 

 

 

 

 

Dagstukkies met Hugo 6 Desember 2019

 Openbaring 4:2-3#Kleur

“Ek het gesien daar staan ‘n troon in die hemel en op die troon sit daar iemand.  Sy voorkoms was soos opal en karneool.  Om die troon was daar ‘n reënboog met die glans van smarag.”

Op die troon sit God die Vader.  En Johannes het ’n gebrek aan woorde om die heerlikheid en skoonheid en heiligheid van God te beskryf!  Selfs al was sy pallet gevul met elke kleur van die reënboog, of met die glans van smarag.   So heerlik en rein en oorweldigend is die teenwoordigheid van God, die aangesig van God, dat Johannes met min woorde aan die hand van ’n paar kosbare edelstene God beskryf.  Opaal, karneool en smarag.  En tog lê daar in elkeen van hierdie edelgesteentes betekenis opgesluit.  Opaal – deursigtige steen soos ‘n diamant – ‘n simbool van heiligheid, heerlikheid, skoonheid en suiwerheid.  Karneool – ‘n rooi steen wat iets van Goddelike oordeel uitbeeld.  Smarag groen, genade en goedheid.

Vanaf die troon regeer God oor dit wat in die hemel aan die gebeur is, maar Hy regeer ook oor die skepping en regeer oor ons, sy skepsels.  Alles is in hul bepaalde skeppingsorde.  Hy is ten volle in beheer!  En tog in die warboel van die uitdagings van ons hedendaagse lewe, en ‘n wêreld wat lyk of dit uitmekaar val, vra die mense vra oor waar God is?

God is steeds op Sy troon.  Hy vrywaar ons nie van lyding nie,  maar Hy staan by ons.  Hy hou nie alle laste van ons af weg nie, maar Hy dra dit saam ons.  Hy het die dood nie uitgeban nie, maar Hy het wel die mag daarvan gebreek.  God het nie gekom om ons leed weg te neem nie.  Hy het ook nie gekom om ons leed te verklaar nie.  Hy vul net ons lewe en ons leed met Sy teenwoordigheid.

Die Here Jesus bemoedig Sy volgelinge: “Hou moed: Ek het die wêreld klaar oorwin.” Ons word in die brief aan die Hebreërs daaraan herinner dat “daar ook niks in die skepping is wat vir God onsigbaar is nie; alles lê oop en bloot voor sy oë. En aan Hom moet ons rekenskap gee.” Heb 4:13.  Ons dien ‘n kleurvolle, soewereine God, wat die begin tot die voleinding ken en nooit deur wêreldgebeure verras word nie.

Netso is Hy ten volle bewus van die gebeure in ons individuele lewens.  As Christus se volgelinge erken ons egter dat ons perspektief altyd beperk is. Daar is ’n groter prentjie wat ons dikwels nie kan sien nie. God is steeds op Sy troon en Sy planne en doelwitte sal seëvier. Die hele geskiedenis is op pad na die dag wanneer “elke knie sou buig, en elke tong sou erken:  ‘Jesus Christus is Here!” Fil 2:10-11.

Dagstukkies met Hugo 5 Desember 2019

 Markus 9:2-3#Kleur

Toe het Sy voorkoms voor hulle oë verander, en Sy klere het blink geword, spierwit soos niemand op aarde dit kan maak nie.

Die Bybel sê dit is moontlik vir elke gelowige om die Here se heerlikheid te sien. In werklikheid sê God dat Hy Sy heerlikheid sal openbaar aan almal wat Hom daarvoor soek. Die openbaring van Sy heerlikheid is bedoel om ons toe te rus vir die storms van die lewe.  “…Sy klere het blink geword, spierwit soos niemand op aarde dit kan maak nie.”  Wit is ‘n kleur, dit bevat alle kleure van die spektrum, maar wat presies is God se heerlikheid, en hoe lyk dit?  In eenvoudige terme is God se heerlikheid ‘n openbaring van Sy natuur en Sy karakter eienskappe. Wanneer die Here kies om aan ons Sy heerlikheid te wys, is dit ‘n openbaring van hoe Hy wil hê ons Hom moet ken.   Toe die Here vir Moses gestuur het om Israel te verlos, het Hy aan hom gesê, “Gaan en sê EK IS stuur jou.” Maar hy het geen verduideliking gegee van wie “EK IS” was nie.  Daarom het Moses uitgeroep, “Laat my tog u heerlikheid sien” (Exodus 33:18).   Moses het ‘n honger gehad om te weet wie die groot EK IS was en wat die kern van Sy natuur en karakter is.   God het Moses se gebed beantwoord.

Toe het sy voorkoms voor hulle oë verander, en sy klere het blink geword, spierwit soos niemand op aarde dit kan maak nie.   Jy sien, wanneer God sy heerlikheid openbaar, en Sy voorkoms voor hulle verander, en Sy klere blink word, spierwit soos niemand op aarde dit kan maak nie, het Hy ‘n doel daarmee.   En Hy het toegelaat dat mense Sy heerlikheid sien, sodat die mense, deur die begrip daarvan, verander kan word.  Dieselfde is vir ons waar vandag.  God openbaar Sy heerlikheid aan ons sodat ons gerusgestel kan word in ons daaglikse wandel.  Jesus Christus is die uitdruklike beeld van God. Die Vader het Sy hele karakter in die Seun opgesom. Toe die Here vlees geword het, was dit die volle openbaring van God se natuur, Sy genade, Sy goedheid en Sy gereedheid om te vergewe. Dieselfde is waar vir enigiemand wat die openbaring van God se heerlikheid ontvang. Ons wat in Christus is, is bedoel om verander te word in die uitdrukking van God se liefdevolle, vergewende, genadige natuur.

Paulus sê dat wanneer ons God se sien, dit krag het om die een wat Hom sien, te verander: “En terwyl ons almal met onbedekte gesig soos in ‘n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is” (2 Korintiërs 3:18).Hou aan om God se heerlikheid te soek totdat die openbaring daarvan in jou oopbars!  Die eerste effek van God se heerlikheid is ‘n verandering in ons verhouding met Hom.  Mag jy so aangeraak word deur God se heerlikheid wat jou lewe aanraak, deur dit wat jy sien en beleef — hoe genadig, geduldig en liefdevol God is met sy kinders, selfs hulle wat Hom bedroef het — dat jy in verwondering Hom sal aanbid.  Die kennis van die glans van Sy heerlikheid, Sy natuur en karakter, dra ons na ‘n plek van totale rus. Inderdaad, wanneer ons eers hierdie openbaring van God se heerlikheid het, het ons nooit weer nodig om te vrees nie. Vir die wat God aanbid, hulle sien Sy heerlikheid in Sy liefde teenoor mense en hulle gryp daardie heerlikheid vas om hulle besorgde siele te laat bedaar.