Dagstukkies met CLF 26 Junie 2020
Junie 26, 2020
Wees soos Jesus
“As iemand jou dwing om sy goed een kilometer ver te dra, dra dit vir hom twee kilometer”
(Matteus 5:41)
In die Bybel kry ons baie lesse en waarhede wat ons elke dag in ons lewens kan gebruik. Wat ’n wonderlike boek is die Bybel nie! Baie boeke is al deur die jare geskryf, maar na ’n tyd lees niemand dit meer nie. Daarom kan ons glo dat die Bybel deur God self aan ons gegee is, want na duisende jare word die Bybel steeds gelees.
Een van die lesse wat Jesus vir ons gee, is om aan ander mense meer te doen as wat hulle van ons verwag. Dikwels vra iemand vir jou om iets te doen. Partykeer is ons onwillig, maar ons teksvers leer dat ons daardie bietjie meer moet doen.
Die Here doen en gee so baie vir ons, meer as wat ons vra. Gaan sit ’n oomblik stil en dink aan al die goeie dinge wat ons van God ontvang. Doen ook aan ander meer as wat hulle vra.
Liefdevolle Heer, dankie vir alles wat ek van U ontvang. Help my om vir ander ook meer te doen. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
