Dagstukkies met CLF 14 Maart 2020
Maart 14, 2020
God se liefde vir ons
“Soos ’n vader hom ontferm oor sy kinders, so ontferm die Here Hom oor dié wat Hom dien”
(Psalm 103:13)
Dwarsdeur die Bybel lees ons hoe lief God vir ons as mense het. God self het ons gemaak. Hy ken ons. Ons is sy kinders. Sy liefde vir ons sal nooit ophou nie.
In Psalm 103 word God geprys omdat sy liefde so groot is. Die Here gee vir ons alles wat goed is, Hy gee gesondheid en krag, Hy laat ons lewe. Hy laat ons altyd weer soos ’n jong arend vlieg.
Maar die Here is ook genadig. As ons ons sonde erken en ons vra vergiffenis, dan vat Hy ons sondes heeltemal weg. So ver as die ooste van die weste af is, so ver vat Hy ons sonde van ons weg.
God is ons Vader. Nog meer as wat ’n vader sy kinders liefhet, so het God vir ons lief. Hy het ons altyd lief. Hy wil net die beste vir ons gee.
Is jy ’n goeie vader of moeder? Kan jou kinders iets van God se liefde in jou lewe sien?
Here Jesus, baie dankie dat U vir altyd vir my sal lief wees. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
