Dagstukkies met CLF 12 Maart 2020
Maart 12, 2020
Skuil by God
“Hy sal sy engele opdrag gee om jou te beskerm waar jy ook al gaan” (Psalm 91:11)
Ons lewe in ’n wêreld waar daar baie geweld en misdaad is. Daar is siektes en allerlei teëspoed wat ons bang maak. Ons voel onveilig en bekommerd en ons weet soms nie watter kant toe nie.
In Psalm 91 is daar vir ons troos; dit laat ons veilig en beskermd voel. Daar staan dat ons maar by God kan skuil en sy beskerming kan vra. Soos kuikentjies onder hulle ma se vlerke invlug as daar gevaar is, so kan ons onder God se beskerming invlug; Hy sal ons van alle kante beskerm.
God het ons lief, Hy weet wie Hom ken en Hom aanroep, en Hy gee sy engele opdrag om ons te beskerm, selfs al is daar gevare.
As jy vandag bekommerd of vol angs is, gaan na God, vertel hom van jou probleme en jou nood, Hy sal hoor, en vir jou ’n veilige skuiling wees. Almal wat hul toevlug tot God neem, sal nie teleurgesteld wees nie.
Dierbare Here, dankie dat U altyd daar is waar ek kan skuil. Dankie dat ek U kan vertrou. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
