13 Julie – Hartereeks met Elize: Brose harte en verwerping
Julie 13, 2020
Maandag 13 Julie: Brose harte en verwerping
Kom ons gaan terug na die Here, want Hý het ons verskeur maar sal ons weer gesond maak, Hý het ons geknak maar sal weer ons wonde verbind.
– Hosea 6:1
Verwerping laat nie net jou hart nie, maar ook God se hart breek.
Ons Vader wil ons liefde hê en vra op soveel maniere daarvoor, maar ons verwerp Hom net so dikwels soos wat die volk Israel gedoen het.
Dit is veral ons liefde vir valse gode wat die Vader se hart breek. Maar Hy neem ons altyd weer onvoorwaardelik terug net soos wat Hosea met sy afvallige vrou, Gomer, in sy tyd as profeet gemaak het.
Jesus ken verwerping. Hoe seer moes dit gemaak het toe sy eie mense en familie Hom uit sy geboortedorp, Nasaret, gejaag het!
So, wanneer jy met jou verwerping na Jesus kom, verstaan Hy jou gebroke, brose hart. Jesus is hoop in aksie. Hy sal Homself in die proses aan jou openbaar.
Gedurende hierdie heelmaakproses moet jy versigtig na sy stem luister en sy troos jou eie maak. Verwerping deur mense is partykeer sy manier om jou van rigting te laat verander.
’n Deur wat toemaak is ’n rigtingwyser na waar Hy jou nie wil gebruik nie.
Die troos is dat die God wat jou hart geskep het, jou seer hart wil regmaak voordat Hy nog ’n deur oopmaak.
Tyd en geduld is sy genade-geskenke aan jou.
Aksieplan…
Aanvaar ons liefste Vader het ’n genadeplan vir jou lewe. Toe deure en geslote harte is deel daarvan. Dit is nie sy wil vir jou om aan jou pyn vas te hou nie. Daarom sal Hy jou volkome herstel as jy diegene wat jou verwerp, vryspreek.
Gebed … Vader, dankie dat U aanhou openbaar dat U lief is vir my. Ek kies om dit te glo en te aanvaar u liefde kan my van enige gevoelens van verwerping herstel. Amen.
Lees ook: Lukas 22:39–46
Luister na die teks: Maandag Brose harte en verwerping
