Paasgebede 17 April 2019
April 17, 2019
Deur Elize Parker
Pleidooi
Jesus, ek voel soms so magteloos om my gesin te beskerm,
net soos Maria gevoel het toe sy U by die graf gaan soek het.
Toe sy u lyk wou gaan versorg het met kruie en speserye.
En toe, die skokbesef, sy was te laat! U was weg!
Sy kon U nie meer versorg of oppas nie.
Maar ook vir my is daar dieselfde troos as vir Maria, dankie Jesus.
Sy kon omdraai, oor haar skouer kyk en U was daar.
Soos altyd, is U ook teenwoordig as ek omdraai.
U is altyd besig om na my veiligheid om te sien.
U is altyd gereed, Heer, om te help, aan te moedig en te red.
Ons loof en eer U daarvoor.
Help ons om ons gedagtes op u nabyheid te hou
en ’n lewende verhouding met U bo alles te stel.
Ek het u nabyheid elke oomblik nodig, Heer,
ek kan nie daarsonder klaarkom nie.
Help my, Heer, om U op te soek.
U nabyheid hou my staande.
Amen.
