Oggendrooi se Anton – meer as net ‘n mooi stem

April 12, 2019

Datums is vir Anton Brink belangrik. Baie belangrik. Eintlik net een datum, 6 November. Dis die dag waarop Anton goeie wense, heelwat geskenke en baie “Veels-geluk-liewe-Anton-liedjies” verwag.

Anton, die meester van “flou jokes” en grootste aanhanger van sy mede-aanbieder Gerald Petersen, is in die geheim eintlik ‘n baie ernstige man. Hoewel Anton gereeld deeltjies van sy verborge sangtalent op lug en via WhatsApp-boodskappe aan medepersoneel openbaar, kan hy spog met drie goue en een platinum toekennings vir sang wat hy in 2018 by die South African Talent Championships verwerf het. Hierdie trotse pa van twee deel dan ook sy talent vir sang (en drama!) met sy 10-jarige dogtertjie Léri wat pas verskeie medaljes by die South African Championship of Performing Arts verwerf het. Sy 13-jarige seun, Léhan, blink weer uit in tennis en hokkie en hou ook sy lyf model! Tydens verlede jaar se South African Talent Championships is hy aangewys as die algehele wenner in die juniorafdeling vir seunsmodelle. Albei is in Laerskool Panorama, waar Anton ook die voorsitter van die Beheerraad is. ‘n Taak wat hy met groot erns aanpak.

‘n Mens kan egter nie van Anton praat sonder om sy vrou van 15 jaar, Arlene, in dieselfde asem te noem nie. Anton het reeds by verskeie geleenthede erken dat sy familie – behalwe sy liefde vir God – die groot dryfkrag in sy lewe is. Dit is al waarvoor hy onthou wil word – ‘n goeie man en pa.

Anton is reeds meer as 20 jaar in radio en net so gemaklik op ‘n verhoog as seremoniemeester as agter ‘n mikrofoon. Deesdae skuif hy vroegoggend saam met mede Oggendrooi-aanbieder Gerald in – draai die lugversorging op yskoud sodat Gerald sy pers kombers kan uitruk – en verseker dat die luisteraars hul dag met ‘n lag en op ‘n hoë, geesvervulde noot kan begin.

Wat minder mense van Anton weet, is dat hy ‘n groot visserman is (nie noodwendig suksesvol nie, maar die groot een wag vir hom!), dat hy die gesogte titel van Mnr. Struisbaai op die jong ouderdom van 18 verower het (en steeds die strandhanddoek en sambreel as bewyse het!) en dat hy, saam met sy gesin, die baie suksesvolle Smithland Guest Apartments in Parow besit en bestuur. Anton is nie skaam om op te staan vir wat reg is nie, hy is openlik lief vir die Here en is die week se skrywer van Dagstukkies met Anton op Radio Tygerberg 104fm se blog. Anton skryf oor #Opstanding.