Hugo Weich – Soldaat vir Jesus
Oktober 23, 2019
Deur Helané Theunissen
Predikant met vele talente
Ons luisteraars sal bekend wees met die stem van Hugo Weich. Die predikant van Harmonie Gemeente in Bellville lewer gereeld preke op ons luggolwe, maar hy het nie slegs predikant op sy CV nie.
Hugo het 20 jaar se ervaring in die Suid-Afrikaanse lugmag en is ‘n oud-Lugmag Luitenant-Kolonel. Hy het kwalifiasies in Kommunikasie en Bemarking en het ook sy MBA voltooi. Hy het in 2006 voltyds vir die NG Kerk begin werk by Kerksondermure deur wie hy ook verder teologiese studies aangepak het.
Hugo Weich kom uit ‘n familie van predikante. Sy groot-groot ouers was feitlik almal sendelinge en ander het help vertaal aan die Bybel. Sy ouers het ook in verskeie gemeentes bedien. Maar ten spyte van hierdie indrukwekkende bloedlyn was sy hart nooit spesifiek in voltydse bediening nie. Hy was oortuig dat sy musiekbediening sy groot roeping was. Hierdie man is ook ‘n talentvolle klavierspeler en sanger. Hy het bykans 30 jaar van sy lewe gewy aan musiek. Eers alleen en later met sy vrou, Retha, wat hy by ‘n jeugkamp (waar anders!) ontmoet het . Hierdie besonderse paartjie vertel dat die Here hulle geroep het vir die Noordelike Voorstede in die Kaap en het hulle hul lewens in Centurion agtergelaat om ‘n gemeente te kom plant in die Moederstad. Na 29 jaar se getroude lewe en vier jaar in die Kaap kan hulle getuig van ‘n Goddelike roeping waar die Here presies voorsien wat hulle nodig het om ‘n verskil te maak in Sy koninkryk.
Hugo en Retha geniet Kaapstad en elke stukkie skoonheid en vreugde wat die stad bied. Hulle maak altyd tyd om by die see te gaan stap of iewers rustig te raak in die natuurskoon. Behalwe sy liefde vir musiek en klavier kan Hugo ook skilder en daar hang darem al ‘n paar Weich-skilderye teen gelukkige kopers se mure!
Die Weich’s het een dogter, een seun en een kleinkind. Hul seun, Heinrich en sy vrou, Anika, is albei aanbiddingsleiers by Every Nation in Centurion en is die trotse ouers van Hugo se kleinkind, Tessa. Hul dogter, Marichen werk voltyds saam met hulle by Harmonie Gemeente en studeer deeltyds kunsterapie. Dit wil voorkom asof sy haar pa se kunstalente geërf het.
Hugo glo dat elke mens soekend is. “Ons het die roeping en verantwoordelikheid om deur die leiding van die Heilige Gees kontak te maak met hulle wat nog nie die waarheid ontdek het nie; om hulle met LIEFDE die pad na Jesus toe te wys.” Hugo se droom vir ons land en die Wes-Kaap is dat individue, families, samelewings en omgewings sal herstel omdat God hulle kom verander deur die enigste weg, waarheid en lewe – Jesus Christus.
Hugo is hierdie week ons skrywer van Dagstukkies met Hugo met die tema #Gesondheid.
