Hoe eet jy ‘n olifant…
Mei 20, 2020
…happie vir happie!
In ‘n tyd wat eintlik net as onwerklik beskryf kan word, word ons gedwing om dinge stap vir stap en dag vir dag te neem. Vir die laaste meer as 60 dae is ons dag-tot-dag bestaan totaal op sy kop gedraai. Talle het hul werk – waarvoor hul reuse lenings moes uitneem, of reeds jare toegewyd aan gewerk het of wat geslagte reeds in die familie was – verloor. Sommige moes drasties afskaal. Alle luukses is gestop, in baie gevalle is baie noodsaaklikhede ook gestop.
Wanneer daar aansoek gedoen is vir alle reddingsboeie, alle reserves uitgeput en alle opsies deeglik oorweeg, ondersoek en probeer is, waarheen dan?
Een vrou van Kaapstad het daardie olifant vierkantig in die oë gekyk en begin hap. En hap. En hap.
Magdél Steyn het, saam met eVoucher.mobi en The Significance Network weggespring om persone in nood met dié wat ‘n helpende hand kon uitreik, te verbind.
“Ons het aanvanklik met kospakkies probeer help maar dit was duidelik dat die nood net te groot was. Inperkingsregulasies het dinge ook bemoeilik en aangesien mense se behoeftes so uiteenlopend is – alles van kos, krag, brandstof of ander uitgawes, was die koopbewys ‘n praktiese oplossing,” sê Magdél.
“Ons het vandat die Staat van Inperking aangekondig is, tot nou, direk, 447 gesinne (1378 persone!) gehelp. Indirek is daar sowat 200 gesinne wat al gehelp is. Ek sal jok as ek sê dis maklik of dat ek nie telkens wonder waarin ek myself begeef het nie”, lag sy, “maar wanneer mense bereid is om regtig moeite te doen, is enigiets moontlik.”
Sy en haar span volg ‘n baie streng proses om te verseker dat die mense wat hul help, slegs eenmalig hulp ontvang, en so ver moontlik, nie die proses en goedhartigheid misbruik nie.
“Met dié dat ons die koopbewyse gebruik, stel dit ons in staat om mense regoor Suid-Afrika te help, en nie slegs in een gebied of provinsie.”
HOE WERK DIT
Indien jy in nood verkeer, kan jy na www.thechangemakers.co.za gaan, of aansluit by die ChangeMakers Facebook-groep.
Indien jy kan help, met ‘n geskenk- of koopbewys direk aan iemand in nood of met fondse, besoek gerus https://www.thechangemakers.co.za/donate/
Magdel is ook die stigter en eienaar van Movers & Shakers wat Radio Tygerberg se vennoot is vir die 104Netwerk en haar maatskappy, MSMedia was ook verantwoordelik vir die bou van hierdie webblad. Besoek haar gerus.
