#GenoegIsGenoeg (Dwelms)
September 10, 2019
#GenoegIsGenoeg – Deel 1
Drie jaar gelede het die #1000Women1Voice ‘n veldtog geloods wat bekend gestaan het as #EnoughIsEnough.
Dit was in ‘n tyd waar daar in ‘n kort tydperk talle verkragtings en moorde was. Vroue het landwyd en op sosiale media hul steun aan die projek gegee (video).
Dit is drie jaar later. Suid-Afrika beleef tans een van die donkerste tye in sy geskiedenis. Vroue en kinders word uitgemoor, vermorsel, verkrag en vergeet.
Mans ook.
Mense, soos ek en jy.
Iemand se pa. Iemand se ma. Iemand se kind.
As deel van Radio Tygerberg 104fm se #ROOIverskil, wil ons nie net die goeie nuus versprei nie, maar ook die flitslig hou op dit wat daagliks in die donker van ons land gebeur. Verkragting, moord, verbale en fisiese aanranding. Die afbreek van mense, gesinne, gemeenskappe en uiteindelik ‘n nasie.
Die oorsprong hiervan is legio. Gebroke gesinne, afwesige vaders, bendes, armoede, pornografie, geweld op TV, sedeloosheid, werkloosheid en dwelms. Talle van die uitdagings en probleme waarmee Suid-Afrika tans sit, spruit uit die misbruik van alkohol en dwelms.
Die plaaslike regering se gemeenskapsontwikkelingswerkers het onlangs by die Nelson Mandela Vredespark in Delft op die Kaapse Vlakte ‘n vroueoggend aangebied wat juis oor die onderwerp van dwelmmisbruik gehandel het.
Die vroue is gemotiveer om aktief betrokke te raak by hulle gemeenskappe. Rolspelers soos SASSA, SAPS, Touching Nations en vroue van Clicks het die oggend volgemaak met toesprake, geskenkpakke en ‘n gratis voetmassering.
Vroue is ook opnuut herinner om saam te werk om alkohol-en dwelmmisbruik in die kiem te sweer. Vroue wat ‘n slagoffer is van geweld, alkohol en/of dwelmmiskbruik kan hulp kry by onder meer die plaaslike polisiestasie. Die Slagoffer Bemagtigingsprogram kan ook gekontak word op 021 483 5045 of die nie-winsgewende organisasie Mosaic kan by 021 761 7585 geskakel word. Die werk wat die Forward Fund Trust en die 1000 Women Trust doen het reeds duisende vroue met ‘n veilige tweede kans gehelp.
Maar daar is altyd hoop! Op #Oggendrooi is die ongelooflike transformasie van voormalige dwelmverslaafdes bespreek soos wat op die FaceBook-blad, The Addict’s Diary, te sien is. Een van ons luisteraars, Leeroy, het ook hierdie foto van hom ingestuur. Hy was vir 10 jaar verslaaf aan dwelms en het uiteindelik besluit om sy lewe heeltemal te verander en die resultate spreek vanself.
Luister ook na die gesprek op Oggendrooi (10 September 2019) wat oor The Addict’s Diary was.
Moeder Teresa word vir talle waarhede onthou, onder andere:
If you want to change the world go home and love your family.
Begin vandag daar, by jouself. Wees die verskil en maak seker dat in September 2019 genoeg werklik genoeg was.
Maak jou huis skoon.
Bel jou ouers.
Vergewe jouself.
Bid.
Bid weer. Nooi Hom in sodat jy werklik kan verander en lewe volgens hemelse standaarde.
“Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin. ” – Johannes 16:33 (OAV).
