Dis oorlog met Adrie!
Junie 9, 2019
Deur Eunice Stoltz
Dalk is dit nie toevallig dat ons eie voormalige skakelbeampte en huidige sosiale media koördineerder, Adrie Jurgensen, dié week se Dagstukkies met-rubriek met die tema, #oorlog, behandel nie. Want sy is iemand met wie jy ‘n oorlog – geestelik of fisies – vierkantig in die oë kan kyk en sê: tot die einde toe.
Sy is gebore in Gauteng en het daarna in Kakamas op ‘n plaas met die naam Arabees – wat plek van min water beteken – gebly, maar Adrie sal vir jou sê sy is oorspronklik van Mosselbaai! Reeds op ‘n jong ouderdom het haar familie besluit om die Kakamas-lug vir vars seelug te verruil en hulself in Mosselbaai te hervestig. In Mosselbaai is Adrie dan, nie gebore nie, maar getoeë. Van graad nege verhuis hul na Riversdal waar sy aan die Hoërskool Langenhoven matrikuleer in 1994. In 1995 raak sy ‘n soldoedie in die Suid-Afrikaanse Weermag waar sy van SALVKOL in George tot in Lohatla in die Noord-Kaap diens verrig. Haar dissipline, hardewerk en sterk dryfveer lei tot die rang van Tweede Lieutenant in die Suid-Afrikaanse Weermag.
Studeer het sy ook! Deur letterlik op te weeg watter kursus klink meer interessant het Adrie Skakelwese bo BRek gekies en studeer sy aan die Kaapse Technikon (CPUT). Sy voltooi haar internskap by Naspers waarna sy dan ook binne die sfeer van media bly. Sy begin haar loopbaan as skakelbeampte by Die Burger en werk op verskeie groot projekte insluitende die jaarliks KKNK op Oudtshoorn en die Nasionale Skoolkoerantprojek. Adrie het die korporatiewe leer geklim tot waar sy uiteindelik die pos as Groepbestuurder vir Gemeenskapsprojekte by Media24 volgestaan het. Dit is dan ook waar haar hart is: mense!
Naas haar man en kinders is haar passie diensbaarheid teenoor ander. Adrie het een man en twee jong seuns – sy glo hulle is baie snaaks en die mooiste manne! Hulle het ook onlangs die hoof praatrolle in ‘n radio-advertensie vir Radio Tygerberg 104FM vertolk en natuurlik hulself baie goed van die taak gekwyt.
Indien jy ooit in nood is, werk soek, mentorskap nodig het of iets gedoen wil hê is Adrie jou eerste opsie om te skakel. Sy het in 2018 by Radio Tygerberg 104FM begin werk en het sedertien baanbrekerswerk as skakelbeampte verrig. Van groot vennootskappe, gemeenskapsveldtogte tot interne skakeling onder personeellede is Adrie Jurgensen iemand saam wie jy ‘n oorlog wíl voer.
Mag hierdie week se dagstukkies jou verhouding met die Here verryk en wie weet, dit is dalk ook nie toevallig dat jý hierdie week se #oorlog-tema saam met ons behandel nie.
