Dagstukkies met CLF 1 Maart 2020
Maart 1, 2020
My sonde
“Ek bely my ongeregtigheid, my sonde kwel my”
(Psalm 38:19)
Elke mens doen een of ander tyd verkeerde dinge. Ons almal word met sonde gebore. Ons is sondaars van geaardheid. Gelukkig sal die Here ons vergewe as ons berou het daaroor.
In hierdie Psalm skryf Dawid dat sy sonde van die verlede hom pla. Hy sê dat hy dit nie meer kan uithou nie, en dat God hom tog nie moet verlaat nie. Hy vra dat die Here hom tog gou moet help.
As verkeerde dinge uit jou verlede jou kwel, gaan op jou knieë en vra die Here om jou te vergewe. Vertel Hom alles, Hy sal verstaan, jou genadig wees en jou die krag van die Heilige Gees gee om te kan stry teen die sonde. Lewe dan soos ’n nuwe mens en dank God vir sy vergifnis.
Wonderlike Here, dankie dat U my sondes vergewe. Help my om elke dag teen die sonde te stry. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
