Dagstukkies met Louise 16 Desember 2019
Desember 16, 2019
Johannes 3:3: #Gebore
“Daarop sê Jesus vir Hom: Dit verseker ek jou: as iemand nie opnuut gebore word nie, kan hy die koninkryk van God nie sien nie.”
Ons God is werklik ‘n God van tweede kanse. Hy weet dat ons sondige mense is, en dat Hy vir ons, nie net ‘n tweede kans gee nie, maar ons verseker dat dit die enigste manier is om die koninkryk van God te sien. Ons kan God en sy koninkryk net sien as ons deur God aangeraak word, as geloof in ons harte deur Hom aangesteek word, as ons kindskap as ’n gawe van Hom ontvang.
Ek en jy weet dat om ‘n sinvolle lewe hier op aarde te kan geniet ons God moet toelaat om Heer en Meester van ons harte en ons lewens te wees. Die Heilige Gees por ons ook dikwels aan – jy weet mos daardie stil stem wat ons baie keer nie ag op slaan nie? In hierdie Advent tyd, wil ek die geleentheid aangryp vir ‘n tweede kans. Jy kan die geleentheid aangryp vir ‘n tweede kans. Ons kan opnuut gebore word deur die Here te vra om in ons harte te kom bly, en die middelpunt van ons bestaan te wees.
