Dagstukkies met Hugo 4 Desember 2019
Desember 4, 2019
Psalm 52:10: #Kleur
“Maar ek sal wees soos ‘n groen olyfboom in die huis van God; ek vertou op die goedertierenheid van God vir ewig en altyd.”
Dawid kom gee ‘n onderwysing uit Psalm 52, wat beteken dat ons fyn op die uitkyk moet wees vir die les wat ons hieruit kan leer. Hy gebruik die beeld van ‘n olyfboom, en die groen olyfboom simboliseer hier hoofsaaklik getrouheid en standvastigheid. Ongeag die omstandighede: warm, droog, koud, nat, rotsagtig of sanderig, die immergroen olyfboom bly aan die lewe en lewer sy vrug op sy tyd. Dis so ‘n mooi beeld vir die wat verbind is aan Christus, wat die volheid van Sy heerlikheid en liefde ervaar, en vrug dra wat daarby pas.
Daar word gesê dat ‘n mens ‘n olyfboom nooit kan uitroei nie. Selfs al word dit afgekap of verbrand sal daar altyd nuwe lote uit sy wortels groei. Hierdie Psalm herinner ons daaraan dat ongeag die lewensomstandighede, ons standvastig soos die olyfboom in die teenwoordigheid van God moet bly – immergroen, getrou, en besig om vrug te dra. Daar is soveel vreugde wat ontdek kan word in God se teenwoordigheid. Dis die enigste plek waar ware blydskap, ewigdurende blydskap, wat nooit uitgeroei kan word, ontdek word – in die teenwoordigheid van God.
Psalms 16:11: ‘U sal my leer om reg te lewe. Daar is niks wat iemand groter blydskap kan gee as om saam met U te wees nie. U gee altyd vir u kinders die heel beste. Hulle kry die heel mooiste wat die lewe aanbied by U.’ Psalm 16 sê: – “in Sy teenwoordigheid is daar volheid van vreugde.” Die geheim is om so te leef dat jy tyd maak om in God se teenwoordigheid te leef. Dit beteken alleentyd, aanbiddingstyd, stiltetyd, tyd in die Woord van God, gebedstyd, ‘n leefstyl van afsondering voor God, te midde van die gejaag en bedrywighede van jou daaglikse lewe. Soms voel dit onmoontlik, veral as ‘n vloedgolf van swaarkry jou tref, want die lewe gebeur. ‘n Groot geheim, liewe groen olyfboom, is om jou met geloof te omgord. Om jou liefdevolle Vader te vertrou in alle omstandighede, maak nie saak wat jou pad langs kom nie. Tog is dit nie ‘n outomatiese refleks nie, dit is ‘n keuse. In der waarheid, wanneer pyn op sy ondraaglikste is, moet ons kies om in geloof na God uit te roep. Want dit is in Sy teenwoordigheid wat ons groei, wat ons sterk staan en wat ons geloof versterk word, sodat ons vrug kan dra.
