Dagstukkies met Dennis 8 Julie 2019
Julie 8, 2019
Efesiërs 4:2: #Geduld
“Wees altyd beskeie, vriendelik en geduldig, en verdra mekaar in liefde.”
Daar is so baie dinge in die lewe waarmee baie mense worstel en geduld is een van hulle. Kyk maar in die daaglikse gang van die lewe. Mense wil nie wag nie want geduld is nie in hulle woordeskat nie.
Apostel Paulus vermaan die volk van Efese in vers een om waardig in die roeping te wandel waarmee hulle geroep is. Dit wil voorkom asof daar onderlinge verdeeltheid was, mense wat nie wou wag op die Here nie. Klink dit nie bekend nie! Hierdie soort gesindheid kry ons feitlik in enige organisasie, mense wat nie kan wag om bo uit te kom nie en in die proses word baie mense seergemaak. So baie mense lê stukkend en seergemaak langs die pad. Wanneer ons dan waardig in die roeping wandel, moet ons dit doen met alle nederigheid en met lankmoedigheid.
Dawid was selfs gesalf, maar hy moes terug na die skape gaan tot die tyd vervul was dat hy koning kon word. Hy moes geduldig wag en hom berus en dit in liefde verdra.
Vrede / Shalom
