Dagstukkies met Dennis 15 Julie 2019
Julie 15, 2019
Matteus 18:19-20: #Kerk
“Weer sê Ek vir julle: As twee van julle op aarde oor enige saak saamstem en daaroor bid, sal my Vader wat in die hemel is, hulle dit laat kry, want waar twee of drie in My Naam saam is, daar is Ek by hulle.”
Hierdie week gaan die tema oor “kerk” en daarom gaan ons in die Woord kyk waar pas dit in, in die samelewing. Baie mense het hulle eie opinies en idees van kerk, maar ek vertrou dat ons hierdie week meer duidelikheid daaroor sal kry. Ons moet verstaan dat die bymekaarkomplek is die gebou en word in verskillende lande verskillend genoem. Baie noem dit kerk, sommige noem dit sinagoge, ander tempel of huis van die Here en baie as tent van samekoms. Die vraag word baie keer gevra watter insiggewende betekenis het die vergaderplek te doen met die heiligheid van God? Dan volg die volgende vraag: Moet ‘n mens kerk toe gaan?
Jesus wil die belangrikheid van die samekoms egter beklemtoon wanneer Hy in Matteus 18:19 sê: “Weer (dit beteken Hy het dit al voorheen gesê) sê Ek vir julle: “As twee van julle op aarde oor enige saak saamstem en daaroor bid, sal my Vader wat in die hemel is, hulle dit laat kry, want waar twee of drie in My naam saam is, daar is Ek by hulle.” Wat ‘n wonderlike belofte. Dit maak die verskil aan ‘n gewone samekoms en die van die huis van die Here, want waar hulle in Sy Naam vergader daar vul Hy die plek met Sy heerlike teenwoordigheid en niks sal dan weer dieselfde wees nie.
Vrede / Shalom
