Dagstukkies met CLF 22 Maart 2020
Maart 22, 2020
Die Here beskerm
“Die Here beskerm jou, die Here bewaar jou van alle gevare” (Psalm 121:5)
Die skrywer vra die vraag: waar sal my hulp vandaan kom? Rondom was daar berge, rotsvaste berge. Party mense glo daar woon afgode op die berge. Sal die berge beskerming gee? Nee.
Die skrywer weet: my hulp kom van die Here af. Die Here wat nie net die berge gemaak het nie, maar ook die hemel en aarde. Hy is van altyd af daar, en sal altyd wees.
Hierdie God slaap nooit nie, Hy is altyd daar om ons te beskerm. Bedags as die son warm is, is Hy daar, vir ons. En snags as dit donker is, bewaar Hy ons. Hy bewaar ons van alle gevare. En as ons val, tel Hy ons weer op.
Hy bewaar ons oral en altyd.
Liefdevolle Heer, dankie dat U altyd daar is vir my. Dankie dat U altyd hoor as ek vra of na U roep. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
