Dagstukkies met CLF 21 Mei 2020
Mei 21, 2020
’n Moeilike werk
“Dit is moedswillige en hardkoppige mense na wie toe Ek jou stuur” (Esegiël 2:4)
Esegiël was ’n priester in die tyd toe die Israeliete onder die mag van die Babiloniërs gestaan het. Die Israeliete het God vergeet, en daarom het God hulle gestraf.
Op ’n dag het God met Esegiël gepraat. Hy het hom ’n opdrag gegee om na die Israeliete te gaan. Hy moes hulle waarsku en sê dat hulle weer na God moes terugdraai. God het Esegiël gewaarsku dat die mense moeilik sou wees, en nie sommer na hom sou luister nie. Maar God het hom verseker dat hy nie hoef bang te wees nie, want God self sou by hom wees.
Wanneer jy vir God getuig sal jy ook baie hardkoppige mense kry, mense wat dit vir jou moeilik sal maak. Moenie bekommerd of bang wees nie, want die Here stap saam en sal jou help om sy werk op aarde te doen.
Liewe Heer, al is die werk hier op aarde moeilik, help my om elke dag van U te getuig. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
