Dagstukkies met CLF 21 Maart 2020
Maart 21, 2020
Lig vir ons pad
“U woord is die lamp wat my die weg wys, die lig op my pad” (Psalm 119:105)
In die donker nag het ons lig nodig om te kan sien wat ons doen of waarheen ons moet gaan. Ons skakel die lig aan of ons steek ’n kers of lamp aan sodat ons kan sien. Motors, treine, skepe en vliegtuie het ligte om in die nag te kan ry.
Ons wêreld vandag is ook donker van al die sonde. As ons nie ’n lig het wat ons op koers kan hou nie, is ons verlore. In hierdie Psalm word vir ons gesê dat God se Woord vir ons ’n lig op ons pad is, sodat ons in hierdie sondige wêreld die regte pad wat na God toe gaan, sal kan loop. As ons gereeld ons Bybel lees, sal die Here ons leer hoe om sy wil te doen en sal ons eendag die ewige lewe kan ontvang.
As dinge rondom jou donker raak en jy weet nie waarheen nie, vra God om hulp, Hy sal sy Lig stuur sodat jy kan sien waarheen om te gaan.
Here, stuur u lig vir my, sodat ek die pad na U toe kan sien. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
