Dagstukkies met CLF 20 Mei 2020
Mei 20, 2020
Wees vrolik
“Vrolikheid het uit ons lewens verdwyn, ons koordanse het plek gemaak vir rou”
(Klaagliedere 5:15)
Ons almal hou daarvan om vrolik en opgeruimd te wees. Dis lekker om saam met vriende te gesels en die jongmense geniet dit om te dans. Mense wat saam fees kan vier, is gelukkig. Feeste hou die bekommernisse weg.
Die Here wil hê dat ons as sy kinders gelukkig moet wees. Hy wil nie hê dat ons heeldag moet kla en met suur gesigte moet rondloop nie. In ons teksvers kla Jeremia dat daar nie meer vreugde onder sy mense is nie. Die rede is omdat hulle ver van God af lewe.
Wanneer ek en jy naby aan God lewe, sal ons gelukkige mense wees. Dan kan ons die lewe geniet en vrolik wees. Ons mag saam met ons vriende partytjie hou en lekker dans. Solank ons net vir God saam met ons neem en optree soos sy kinders. Nooi die Here ook saam na jou vriende, en julle sal dit geniet.
Dankie, Here, dat ek as U kind ook vrolik saam met my vriende mag verkeer. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
