Dagstukkies met CLF 20 Maart 2020
Maart 20, 2020
Jou vriende
“Ek is ’n vriend van almal wat U dien en u bevele gehoorsaam” (Psalm 119:63)
In die begin het God vir Adam, die eerste mens, gemaak. Toe sien God dat hy baie alleen is, en het toe vir Eva gemaak, as ’n maat vir hom. Mense het ander mense nodig. So is ons vandag nog, ons het familie en vriende en maats nodig. Daarsonder sal ons baie alleen wees.
Nou sê ons teksvers dat ons ons vriende goed moet kies. Ons moet vriende kies wat ook aan God gehoorsaam is. Daar is baie soort vriende, hulle wat God liefhet en ander wat nie God se pad loop nie. Dis baie belangrik om die regte vriende te kies. Vriende kan ’n mens beter maak of aftrek na die verkeerde dinge toe.
Onthou om altyd vriende – en veral ’n lewensmaat – te kies wat ook soos jy aan God behoort. Saam kan julle dan mekaar help om beter Christene te word en so die Here se Naam hier op aarde groot te maak.
Liewe Here, dankie vir vriende in my lewe. Help my om die regte vriende te kies. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
