Dagstukkies met CLF 19 Maart 2020
Maart 19, 2020
Jongmense
“Hoe kan ’n jongmens sy lewe skoon hou? Deur hom te hou aan u woord!” (Psalm 119:9)
Die vraag word hier gevra hoe jongmense, en selfs kinders, moet lewe. Dan kry ons dadelik die antwoord: deur aan God se Woord vas te hou. Dit beteken om te doen wat God wil, om aan Hom gehoorsaam te lewe.
Vandag is daar so baie jongmense en kinders wat ver van die Here af leef. Miskien het hulle ouers nagelaat om hulle van Jesus te leer. Dan is die versoeking groot om verkeerd te lewe, om dwelms en drank te misbruik, te steel, geweld te pleeg of verkeerde keuses te maak. Onder druk van verkeerde maats beland hulle maklik op verkeerde paaie, wat baie hartseer bring.
Daarom sê die Bybel: jongmens, hou vas aan God se Woord. Lees gereeld jou Bybel. Vra die Here om jou te help, dan sal jy ’n skoon lewe hê. Dan wys die Bybel jou die regte pad wat na egte geluk lei.
Help my asseblief, Here, om ’n skoon lewe te lei. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
