Dagstukkies met CLF 18 Maart 2020
Maart 18, 2020
Prys die Here
“Prys die Here, alle nasies, loof Hom, alle volke, want sy liefde vir ons is sterk, aan die trou van die Here is daar geen einde nie! Prys die Here!” (Psalm 117)
Psalm 117 is die kortste van al die Psalms in die Bybel. Dit bestaan uit net 30 woorde, maar dit sê so baie vir ons. Dit roep alle mense van alle volke en nasies op om die Here te prys. Om iemand te prys beteken om net goed van so iemand te praat. Daarom wil die skrywer hê dat alle mense vir God moet prys en loof, want God se liefde vir ons hou nooit op nie. Die Here het ons lief solank ons lewe.
Partykeer maak ons die Here se hart baie seer, want ons doen sonde, maar nogtans bly Hy lief vir ons. As ons vra dat Hy ons sondes sal vergewe, doen Hy dit. Ons as mense sal nooit regtig verstaan hoe groot God se liefde vir ons is nie.
Liefdevolle Here, baie dankie dat U vir my so liefhet. Help my dat ek ook vir U sal liefhê. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
