Dagstukkies met CLF 15 Julie 2020

Julie 15, 2020

God se familie

“Daar is my moeder en my broers! Elkeen wat die wil doen van my Vader wat in die hemel is, dié is my broer en my suster en my moeder” (Matteus 12:50)

Op ’n dag was Jesus besig om met mense te praat. Sy ma en broers het ook daar aangekom en wou met Hom praat. Jesus was so besig dat Hy hulle nie raakgesien het nie. Iemand het toe vir Jesus gesê dat sy familie met Hom wil praat. Jesus doen toe ’n baie vreemde ding. Hy wys toe na sy dissipels en sê dat hulle sy ma en broers is.

Wat wou Jesus hierdeur vir ons leer? Ons kry die antwoord in ons teksvers. Ons wat die wil van God doen, óns is sy familie. Almal wat hul harte vir Jesus gee, is soos een groot gesin in die koninkryk van God.

Elke dag as jy iemand ontmoet wat ’n kind van die Here is, moet jy weet dat julle saam aan God se groot familie behoort.

 

Dankie, my Heer, dat ek ook deel is van u familie. Help my om ook te werk om u familie meer te maak. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.