Dagstukkies met CLF 14 November 2020
November 14, 2020
Gee om vir mekaar
“Dra mekaar se laste, en gee op dié manier uitvoering aan die wet van Christus” (Galasiërs 6:2)
Die lewe vandag is so gejaagd. Ons het amper nie tyd om al ons eie dinge te doen nie. Baie keer sien ons nie eers ons vriende of familie se nood raak nie. Tog herinner Paulus ons daaraan dat ons mekaar se laste moet help dra. Die wet van God verwag ook van ons om ons naaste lief te hê soos onsself.
Jesus is vir ons die voorbeeld van hoe om vir mekaar om te gee. Dink net ’n bietjie na oor hoe Jesus mense gesond gemaak het, hoe Hy mense moed ingepraat het en so baie wat Hy na God toe gelei het.
Vandag doen die Here nog steeds baie vir jou en my. Kom ons volg Jesus se voorbeeld en help ander mense om gelukkig te wees. Troos mense wat hartseer is, praat hulle wat moedeloos is moed in en gee die honger mense iets om te eet.
Vergewe my, Here, dat ek so min vir my naaste omgee. Leer my om soos U te wees. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
