Dagstukkies met CLF 14 Mei 2020
Mei 14, 2020
Veilig by God
“Soos ’n moeder haar kind laat veilig voel, so laat Ek julle veilig voel” (Jesaja 66:13)
Voorgelees deur pastoor Dennis Francis
Ons weet almal dat wanneer klein kindertjies in nood is hulle altyd na hul ma sal gaan omdat hulle daar veilig voel. Wanneer hulle seerkry of bang is, hardloop hulle eerste na hul ma toe. So ’n ma sal hulle dan vasdruk en vertroos sodat hulle weer rustig kan raak.
Hier aan die einde van Jesaja skryf hy dat God ons ook altyd sal laat veilig voel. Die Here weet wanneer ons bang of benoud is. Soms gebeur daar dinge in ons lewens wat ons baie ontstel. Ons weet nie wat om te doen nie, en dan is ons verlore. Baie keer gaan mense se gesondheid ook agteruit van bekommernis.
Gelukkig het ons ’n liefdevolle Vader wat soos ’n moeder vir ons omgee. As jy sy kind is, sal Hy met liefde vir jou help en weer veilig laat voel.
Dankie Here, dat U elke dag as ek benoud is weer kalmte gee, en my veilig bewaar. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
