Dagstukkies met CLF 11 Maart 2020
Maart 11, 2020
Leef elke dag voluit
“Leer ons ons dae so gebruik dat ons wysheid bekom” (Psalm 90:12)
Psalm 90 is ’n gebed van Moses. Hy praat met die Here en sê dat die mense se lewe in God se hande is. God het die mens uit stof gemaak en God laat die mens weer sterwe, en hy word weer stof. Ook sê Moses dat die mense se jare gou verbygaan. Ons lewe omtrent so sewentig jaar of as ons baie sterk is, tagtig jaar. Ons lewe is soos ’n groen grassie wat gou verlep as die droë wind daaroor waai.
Ons almal weet hoe gou die jare verbygaan. Ons weet ook nie wanneer ons sal doodgaan nie. Daarom moet ons elke dag so gebruik om meer van God te leer en van die lewe self.
Leef elke dag voluit tot eer van die Here. Wees gehoorsaam, en doen God se wil. Wees lief vir die Here en jou naaste, sodat wanneer God jou kom haal, jy gereed sal wees om vir ewig saam met hom in die hemel te kan woon.
Here, help my om elke dag voluit vir U te lewe. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
