Dagstukkies met CLF 1 April 2020
April 1, 2020
Salomo se wysheid
“Dié Spreuke is bedoel om mense wysheid te gee en hulle te onderrig sodat hulle weet wanneer iemand verstandig praat” (Spreuke 1:2)
Ons begin nou met die boek Spreuke. Dit is geskryf of versamel deur Salomo en ook ander wyse mense. Die bedoeling met die spreuke is om ons insig te gee, maar ook diep wysheid te leer, sodat ons reg en gelukkig kan lewe.
Jongmense leer nog om reg te lewe en wyse besluite te neem. Ouer mense, wat reeds kennis van die lewe het, moet ook elke dag groter wysheid leer. Kinders moet luister wat hulle ouers en ander wyse mense vir hul leer. Dan sal hulle ’n gelukkige lewe hê. Hulle sal wys wees.
Maar daar is ook dwase mense. Dis dié mense wat ander op ’n verkeerde pad lei, en hulle wat toelaat dat hulle verkeerd geleer word. Om die verkeerde pad te loop, bring net ongelukkigheid en skande.
In Spreuke 1 vers 7 staan daar geskryf dat kennis begin met die dien van die Here. As ons ons hart vir die Here gee, sal Hy ons leer wat reg en verkeerd is, en so sal ons die ewige lewe kry.
Dankie, Vader, vir die boek Spreuke. Help my om daaruit te leer, sodat ek ’n beter mens kan word. Amen.
Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.
