Dagstukkies met Adrie 12 Junie 2019 (Luister)
Junie 12, 2019
LUKAS 10:19: #Oorlog
“Kyk, Ek gee vir julle die mag om op slange en skerpioene te trap, en oor al die krag van die vyand; en niks sal julle ooit skade doen nie.” (1933/53-vertaling)
In die tyd wat ek hierdie rubriek skryf klop my hart warm vir twee mense in Suid-Afrika: Monet van Deventer en Nkosikho Mbele. Op Donderdag 30 Mei was daar ‘n storie op FaceBook van ‘n jong vrou wat haar dankbaarheid uitgespreek het en ‘n petroljoggie bedank het vir R100 van sy eie geld wat hy gebruik het om petrol in haar motor te gooi. Hy was bekommerd dat sy op die N2 sou gaan staan sonder brandstof. Sy het hom nie gevra nie. Hy het aangebied, eintlik aangedring.
Sedertdien is daar meer as R500 000 reeds ingesamel nadat Monet besluit het om fondse vir Nksikho te in.
Dis vir my wonderlik en vreesaanjaend. Wonderlik dat ons in ‘n tyd waar ons bang is vir die nuus ‘n juweel soos Nkosikho kan ontdek. Vreesaanjaend dat dit sulke groot nuus is!
Wat het van ons geword dat om ons naaste – in ‘n Christelike land– te help voorbladnuus is? Ons Groot Handboek, die Bybel maak dit tog duidelik in Lukas 10:27. Die eerste en grootste gebod is om die Here ons God lief te hê met ons hele hart, krag en verstand EN dan ons naaste soos onsself. Net dit. Eenvoudig.
Ons het ongelukkig ‘n bang nasie geword. Bang om werk toe te ry. Bang om huis toe te ry. Bang om winkel toe te gaan, te draf, uit te gaan en meer as alles om langs die pad te gaan staan.
Nkosikho het gesê hy is ‘n gelowige. Wat hy gedoen het, was reg. Ek dank die Here dat hy R100 gehad het om te gee. Want vir hom het syne veelvuldig teruggekom en gaan hy nou ook die geleentheid kry om vir sy kinders se opvoeding eendag te kan betaal.
Hy het nooit verwag om Monet of sy R100 weer te sien nie. Hy het gegee sonder om terug te verwag.
Hoe pas hierdie alles by ons tema van #Oorlog en vandag se teksvers in? Gaan lees die hele hoofstuk 10. Dit begin waar Jesus 72 mense twee-twee uitstuur om Sy Boodskap in ‘n ongenadige wêreld te verkondig, dan lees ons van die barmhartige Samaritaan en eindig met Maria wat – tot groot ontsteltenis van haar suster Marta aan Jesus se voete sit en na Hom luister.
Dit is presies waar ons die #oorlog gaan wen: aan Sy voete, deur barmhartigheid, medelye en opregte liefde aan ons naaste te bewys en deur uit te gaan en Sy Woord aan die wêreld te verkondig. Soos ‘n R100 wat reeds harte regoor die land aangeraak het en vir die jare wat kom gaan vermenigvuldig om ook die volgende generasie hoop te kan gee.
Alles wat mooi is!
Groetnis
